Charta qua Savericus, prior de Parreciaco, promittit abbati Cluniacensi vineam sitam in Terragio de Monte Rachat se relaxaturum.
Nos, frater Savericus, humilis prior de Parreciaco ac ejusdem loci conventus, notum facimus universis presentes litteras inspecturis, quod cum nos, preter venerabilis in Christo patris Yvonis, abbatis, et religiosorum virorum conventus Cluniacensis assensum, vineam quamdam sitam in terragio de Mont Rachat de dictorum abbatis et conventus Cluniacensis feodo, sicut didicimus existere, in qua vinea domum lapideam pro torculari construendo edificavimus, acquisierimus, nos prior et conventus de Parreciaco predicti, pro nobis et successoribus
nostris, predictis abbati et conventui Cluniacensi et eorum successoribus promittimus bona fide et per stipulationem solempnem, prefatam vineam cum domo predicta et toto edificio extra manum nostram ponere infra duos menses postquam nos aut successores nostri predicti ab ipsis abbate et conventu Cluniacense vel eorum certo mandato super hoc fuerimus requisiti; ita quod dicti abbas et conventus Cluniacensis circa feudum suum predictum quoad vineam, domum, edificium predicta nullam omnino jacturam vel injuriam sustinebunt, et ad hoc nos et successores nostros et prioratum nostrum de Pareciaco cum bonis suis mobilibus et immobilibus dictis abbati et conventui Cluniacensi et eorum successoribus specialiter obligamus. In cujus rei testimonium nos, frater Severicus, prior, sigillum nostrum fecimus, et nos, conventus de Parreciaco predicti, quia sigillum proprium non habemus, sigillum curie Edduensis rogavimus presentibus litteris apponi. Datum anno Domini M
o CC
o LX
o V
o, mense augusto.